ភ្នំពេញ៖ រដ្ឋាភិបាលណែនាំដល់អគ្គនាយកដ្ឋានគយនិងរដ្ឋាករ និងអគ្គនាយកដ្ឋានពន្ធដារឱ្យរៀបចំយន្តការពីឆ្នាំ២០២១ដល់២០២៣ ឱ្យដាក់ការយកអាករលើតម្លៃបន្ថែម(VAT) និងពន្ធនាំចូល (Tariff) ជាបន្ទុករបស់រដ្ឋលើសម្ភារៈដែលបម្រើដល់វិស័យកសិកម្មនិងការនាំចេញកសិផលមួយចំនួនរបស់កម្ពុជាដើម្បីជំរុញការស្ដារកំណើនសេដ្ឋកិច្ចឡើងវិញ។

យោងតាមក្របខណ្ឌយុទ្ធសាស្ត្រនិងកម្មវិធីស្ដារនិងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣ សម្ភារៈសម្រាប់សាងសង់ផ្ទះកញ្ចក់/សំណាញ់ ទុយោតំណក់ទឹក ទុយោបាចសាច បំពង់ទីបជួរ PVC ដែលបម្រើដល់ការដាំដុះ សម្ភារគ្រឿងចក្រ គ្រឿងម៉ាស៊ីន និងឧបករណ៍បម្រើឱ្យការផលិត ការកែច្នៃ និងការផ្គត់ផ្គង់ផលិតផលកសិកម្ម ម៉ាស៊ីនរម្ងាប់ដង្កូវរុយចោះផ្លែស្វាយ និងមៀនប៉ៃលិន ម៉ាស៊ីនសម្រាប់បំពាក់ក្នុងបន្ទប់ត្រជាក់ផ្ទុកស្វាយស្រស់ ប្រព័ន្ធកង្ហារត្រជាក់បំពាក់រោងចិញ្ចឹមសត្វ ប្រព័ន្ធដាក់ចំណីសត្វស្វ័យប្រវត្តិ និងគ្រឿងម៉ាស៊ីន និងឧបករណ៍បម្រើឱ្យការងារកសិកម្មអភិរក្ស និងប្រពលវប្បកម្មនិរន្តភាព និងទូរកុងតឺន័រត្រជាក់ដែលប្រើប្រាស់សម្រាប់ការដឹកជញ្ជូនផលិតផលផ្លែឈើជាពិសេស មៀន ទៅទីផ្សារបរទេស គឺជាសម្ភារៈដែលរដ្ឋនឹងរៀបចំចេញថ្លៃអាករ និងពន្ធនាំចូលជំនួសរហូតដល់ឆ្នាំ២០២៣។

រដ្ឋាភិបាលកម្ពុជាបានសម្រេចប្រកាសផ្សព្វផ្សាយក្របខណ្ឌយុទ្ធសាស្ត្រនិងកម្មវិធីស្ដារនិងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣ កាលពីម្សិលមិញដើម្បីជំរុញសេដ្ឋកិច្ចឡើងវិញ។ វិស័យដែលរដ្ឋាភិបាលផ្ដោតក្នុងការស្ដារសេដ្ឋកិច្ចឡើងវិញនេះគឺទៅលើវិស័យសំខាន់ៗចំនួន៤សដែលរួមមានកសិកម្ម កសិ-ឧស្សាហកម្ម វិស័យទេសចរណ៍ វិស័យកាត់ដេរ និងវិស័យកម្មន្តសាសមិនមែនកាត់ដេរ៕